Celine Dion ka anuluar turneun e saj në Amerikën Veriore, për shkak të problemeve shëndetësore.  Me 9 mars do ta mbante turneun botëror, por koncerti është anuluar dhe biletat do të rimbursohen. Që nga viti i kaluar këngëtarja është përballur me sëmundje të muskujve ndërsa shërimi po i zgjat më shumë se sa mendonte. Celine Dion, shfaqjet e së cilës duhej të shtyheshin për shkak të pandemisë, tashmë kishte anuluar koncertet e planifikuara në Las Vegas midis nëntorit 2021 dhe shkurtit 2022.

Dion kishte planifikuar të rifillonte turneun e saj në Denver më 9 mars dhe të performonte në gati 15 qytete të SHBA-së dhe Kanadasë deri më 22 prill.

Tashmë edhe këto koncerte janë anuluar për shkak të shëndetit të këngëtares, e cila vuan nga spazma të rënda dhe të vazhdueshme të muskujve “të cilat e pengojnë atë të këndojë në skenë” dhe kërkon më shumë kohë nga sa shpresonte”, thuhet në një deklaratë.

Celine Dion ka dhënë 52 koncertet e para të turneut përpara fillimit të pandemisë në Mars 2020.

Koncertet e pjesës evropiane të turneut “Courage” mbeten sipas planit. Ato pritet të nisin më 25 maj në Birmingham të Britanisë së Madhe.

Përmes një postimi në Instagram ajo u kërkoi falje fansave duke shpresuar që do të shihen në turneun e radhës.

“Do të jem shumë e lumtur kur të jem sërish e shëndetshme, pandeminë do ta kemi lënë pas dhe unë do të kthehem në skenë”, u shpreh ajo.