Kanye West është përjashtuar nga performanca në ndarjen e çmimeve “Grammy Awards” për shkak të postimeve që ka bërë së fundmi në rrjetet sociale. Ekipi i reperit ka marrë një telefonatë të premten, ku është informuar se është hequr nga formacioni i interpretuesve kryesorë të shfaqjes për shkak të “sjelljes së tij shqetësuese në internet”. Ky vendim vjen vetëm pak ditë pasi u pezullua nga Instagrami për 24 orë pasi shkeli rregullat e kompanisë duke postuar deklarata dhe komente ofenduese e abuzive ndaj ish- bashkëshortes së tij Kim Kardashian dhe të dashurit të saj të ri Pete Davidson. Sipas mediave të huaja, një nga deklaratat e reperit ndaj Trevor Noah, i cili do të prezantojë eventin e këtij viti më 3 prill, ishte një faktor në procesin e vendimmarrjes për përjashtim nga Grammys 2022.
Ndonëse Kanye West nuk do të performojë në shfaqjen më madhe të muzikës, albumi “Donda” i reperit është nominuar për pesë çmime, duke përfshirë edhe çmimin “Albumin e Vitit”.
