Kompania “Facebook”, ndryshoi emrin në Meta disa ditë më parë, por edhe logon. Një kompani farmaceutike gjermane, ka akuzuar gjigantin e teknologjisë se i ka vjedhur logon e saj për migrenën.

“Ne jemi shumë të nderuar që Facebook ndjehet i frymëzuar nga logoja e aplikacionit tonë të migrenës. Ndoshta ata do të frymëzohen edhe nga procedurat tona të privatësisë së të dhënave”, është shprehur kompania gjermane Sense.

Facebook ndryshoi emrin e korporatës në Meta, si pjesë e një ribrandimi të madh. Kompania tha se do të përfshinte më mirë atë që bën, pasi po zgjeron shtrirjen e saj përtej mediave sociale në fusha si realiteti virtual. Ndryshimi nuk zbatohet për platformat e tij individuale, si Facebook, Instagram dhe Whatsapp, por vetëm për grupin që i zotëron ato. Lëvizja vjen pas një sërë historish negative për Facebook, bazuar në dokumentet e brendshme të zbuluara nga një ish-punonjëse. Sipas Mark Zuckerberg, deri në vitin 2031 ne të gjithë do të jetojmë dhe punojmë në metaverse, një seri botësh virtuale të cilat do të bëhen platforma më e rëndësishme e teknologjisë së re që nga zbulimi i internetit. Ai është i bindur se kjo është e ardhmja, saqë këtë javë Facebook njoftoi se do të krijojë 10.000 vende të reja pune në BE të dedikuara për ndërtimin e metaverse.