Koncertet e artistit britanik Elton John në ‘American Airlines Center’ në Dallas janë shtyrë pasi ai rezultoi pozitiv me COVID-19. Muzikanti 74-vjeçar është plotësisht i vaksinuar dhe bëhet e ditur se aktualisht po përjeton vetëm simptoma të lehta, sipas një postimi në Instagramin e tij. John kishte shpallur datat e turneut në qershor të vitit 2021, duke thënë në atë kohë: “Shfaqjet që unë shpall sot do të jenë datat e fundit të turneut tim ndonjëherë në Amerikën e Veriut dhe Evropë. Unë do të dal në mënyrën më të madhe të mundshme, duke performuar më të mirën time, me produksionin më spektakolar që kam pasur ndonjëherë, duke luajtur në vende që kanë pasur aq rëndësi për mua gjatë gjithë karrierës sime”.

Këngëtari sapo ishte kthyer me organizimin e koncerteve live pas një pauze gati dy vjeçare për shkak të pandemisë. Turneu u vonua gjithashtu vitin e kaluar pasi ai iu nënshtrua një operacioni.

Ndërkohë për të gjithë fansat që mesi presin të marrin pjesë në koncertet e tij, është njoftuar se duhet të presin deri në një njoftim të dytë deri në publikimin e datave të reja.