Sipas mediave të huaja organizatorët e festivalit të ndarjes së çmimeve Oscar 2022 kanë biseduar me këngëtaren Beyonce që ajo të jetë një nga performueset kryesore të mbrëmjes. 

Beyonce është në mesin e artistëve të nominuar për çmimin “Kënga më e mirë origjinale”, për kolonën zanore të filmit biografik, “King Richard”, i cili flet për kampionet e tenisit, Venus e Serena Williams si dhe babanë e tyre trajner, Richard Williams. Organizatorët duan që Beyonce të këndojë këngën Be Alive, të cilën ajo e shkroi bashkë me Dixson për filmin King Richard, në një fushë tenisi në Compton-Kaliforni për të hapur ceremoninë, e në këtë mënyrë përmbushet dhe qëllimi që interpretimi i Beyonces të përshtatet me temën e filmit, e më pas gjithë performanca t’i bashkëngjitet ceremonisë.

Burime për mediat thanë gjithashtu se produksioni mund të përfshijë edhe Will Smith, i cili portretizon rolin kryesor në film.

Ndërkohë që emri i Beyonce është konfirmuar, mësohet gjithashtu se Billie Eilish do të jetë një tjetër artiste që do të performojë për Oscar 2022.